Die taal- en kultuurverskeidenheid van ons lede weerspieël net soos ons sang die kaleidoskoop van die Suid-Afrikaanse samelewing. Die meeste koorlede is afkomstig uit Stellenbosch en omgewing en koorlede reis gemiddeld 25 kilometer per motor, taxi of te voet na kooroefeninge. Die ongeveer 110 lede se huistale is Afrikaans, Engels, Xhosa en Sotho. Die meeste koorlede praat Afrikaans by die huis gevolg deur Xhosa wat deur die tweede meeste gepraat word. Die beroepe wat ons koorlede beoefen, wissel van aktuariële wetenskap, arbeidsterapie, joernalistiek, onderwys, motorwerktuigkunde, kinderoppaswerk en plantpatologie tot teologie! Meer as 20 koorlede is ook leiers of dirigente by ander kore soos kerk-, skool- en gemeenskapskore. Die ervaring wat hulle hier by ons opdoen, word in dié kore teruggeploeg.

Nuwe lede word jaarliks in Januarie genooi vir oudisies terwyl bestaande lede ook in Januarie weer oudisies moet doen. Stel jy belang om ‘n oudisie te kom doen of weet jy van iemand wat graag ‘n oudisie wil kom doen? Skakel ons gerus.