Om versoening, solidariteit, vrede en vryheid te demonstreer deur die gedeelde ervaring van koormusiek, terwyl God met vertroue, vreugde en dankbaarheid vereer word.

Ons koor is inderdaad verteenwoordigend van al die mense van ons land, saamgebind deur 'n liefde vir musiek en die gawe om te sing. Ons verbind ons ook tot die opheffing van histories benadeelde gemeenskappe, dus word 'n groot persentasie van die Libertaskoor se inkomste uit konserte aan maatskaplike projekte en hulpbehoewendes geskenk. Lees hier meer oor die tasbare hulp wat die koor aan organisasies uit histories benadeelde gemeenskappe soos die Masikhule-kinderhuis in Khayelitsha bied.

Om wedersydse begrip, agting en vertroue tussen alle Suid-Afrikaners te bevorder, ontgin die koor deurgaans inheemse musiektradisies terwyl nuwe talent ontwikkel en in die gemeenskap teruggeploeg word. Dít doen ons deur gereeld voor plaaslike konsertgehore op te tree en jaarliks na die platteland te reis om musiek terug te neem na die mense waar dit ontstaan het. Klik hier om uit te vind wanneer en waar ons optree.